العين عن حلو الكرى

العين عن حلـو الكـرى موقهـا تـاب
ماتـذوق حلـو النـوم مـع ذايقيـنـه
اسباب لانه مـاش شـي ٍ بـلا أسبـاب
هكـا الغـزال اللـي ذبحنـي بزيـنـه
مـر يتخطـا .. ويتلفلـف بـالاسـلاب
وطيّـر عـن القلـب المشقـا يقيـنـه
من نظرته وقع علـى القلـب مضـراب
اشـد وقـع مـن الـرمـاح السنيـنـه
يسرق نظر عينه حذر .. مدري اعجاب
وانـا منـه قلـبـي تقـطـع وتيـنـه
عرّض ومـن تعريضتـه خافقـي ذاب
وقمـت اتبعـه مغيـر عينـي بعيـنـه
واقفى عجل من نظرتـي فيـه مرتـاب
ويحـط طـول النـاس بينـي وبينـه
وصديت عنه وخاطـري منـه ماطـاب
كني ماني يمـه .. وانـا اقـول وينـه
اخاف يفطن لي .. وننشـب بالانشـاب
السـوق زحـمـه .. والاوادم ذهيـنـه
واخذت عنه شوي مقفي .. والاعصـاب
متـوتـره .. مافـكـرت بتهـويـنـه
ولديـت .. ولينـه يسعـر بالاطـيـاب
عنـد الهنـود اللـي لغتهـم رطيـنـه
وارسلت يمـه نظـرة احبـاب لااحبـاب
النظـره اللـي ماتركـت لـي غبينـه
وأقبـل يبـا يحطنـي عنـه مجـنـاب
وشكيت فـي ممشـاه .. علـى هوينـه
ناظرت فيه .. وضحـك النـاب للنـاب
ومن ضحكتـه حلـت علـي السكينـه
وموه على اهل السوق .. واشر بالاهداب
اشـارة ٍ تبـغـى قـلـوب ٍ فطيـنـه
منها عرفت انه يبـا يعـود لـو غـاب
وان الامـر ماعـاد هـو فـي يديـنـه
وعقب غلاق اسبوع .. مر ومعه جـاب
صغـيّـر ٍ متـجـود ٍ فــي يميـنـه
صغيّـر ٍ بالـزيـن للعـقـل نـهـاب
يقـول اخـوي .. ومقصـده فاهميـنـه
قصده .. يقول انكان عنـدك أستيعـاب
علـى مـن هـذا ؟؟ ملامـح وعيـنـه
واخذت انـا ويـاه .. مـزح وتعجـاب
عقلـه رزيـن .. وكـل كلمـه رزينـه
فـي موقـع ٍ عنـه المخاليـق غيـاب
الا ملائـكـة العـمـل حاضـريـنـه
بينـي وبينـه ماوقـف غـيـر الاداب
آداب سـلــم ٍ كـلـنـا وارثـيـنـه
منه احتـرام شعـور عربيـن الانسـاب
ومنه احتـرام الرجـل نفسـه .. ودينـه
وبغى الوكاد .. وقلت هايـم ومنصـاب
حبـك .. ذبحنـي لعنـبـو والديـنـه
قال استميحك عـذر .. واقـول لعـاب
وش هالغـرام اللـي غدابـك بحيـنـه
وحلفت له .. واقسمت في رب الاربـاب
منقـذ مـن الطـوفـان راع السفيـنـه
انـي معـك صـادق ولانـي بـكـذاب
والـكـاذب الله لايـطـول سنـيـنـه
قال انت صادق .. مار سابقك خطـاب
واهلـي فـي تـال الشهـر موعدينـه
كـم لـه وهـو مغيـر ذهـاب وإيـاب
لاهـم براضيـنـه .. ولا رافضيـنـه
وان كانهـا تمـت علـى يديـن كتـاب
وتـم القـران .. وروحــو كاتبيـنـه
انا تراي ابي اعتبـرك مـن الاقـراب
وعلـى النقـا .. تبقـا صلتنـا متينـه
وودع وصـارت كلمتـه تقـل مشهـاب
اركت على كبـدي (عراقـي مزينـه )
وبقيت في وضع ٍ تحير ابـه الاطبـاب
ايسـت منـه وحالـة اليـاس شيـنـه
واخذت وقـت احسـب ايامـه حسـاب
وقلبـي علـى شوفـه تزايـد حنيـنـه
احيان .. اقول انشد عنه بعض الاصحاب
ويجيـك بالعلـم المـوكـد ( جهيـنـه)
واحيان اقول اصبر على جور الاتعـاب
ورزق الفتى وأجله كتـب فـي جبينـه
وسكت .. ماودي عليـه افتـح ابـواب
للهرج مـن نـاس ٍ ماهـم راحميـنـه
وصبرت .. مار الصبر طـول ولاثـاب
ومـن طـال صبـره يالله انـك تعينـه
ويوم ان راسي من طويل الصبر شـاب
قـررت عنـه انشـد حـدا مجاورينـه
ونشدت عنـه وقـال راحوبـه أجنـاب
ومن قريتـه شـدّ .. وسكـن بالمدينـه
قلت ايه .. مادام اهلـه عندنـا يجـاب
امـا بعيـد الفـطـر .. والا بحتيـنـه
قال اهله معه رحلـو .. قلـت ياشـاب
يعـنـي لازايـركـم .. ولازايريـنـه
قال ايه .. مار انسـه والايـام هـراب
تطـول .. وتنسـي ضنيـن ٍ ضنيـنـه
قبلي .. وقبلك خـلت اصحابن احـزاب
وكم فرقـت بيـن الخديـن .. وخدينـه
ماعاد في شوفـه طلايـب .. وطـلاب
تـرى مـاعـاد الا يــدرج جنيـنـه
وش تطلبه .. وحبالـه بكـف قضـاب
احذر .. لاينصب لـك زمانـك كمينـه
قلـت الرجـال مفتلـة روس الاشنـاب
لااقسـى الظـروف حسابهـم حاسبينـه
وقفيت من عنده على الغلـب .. غـلاب
اكن غيـض القلـب .. واجحـد ونينـه
واعلنت ياسي .. وانطوت صفحة كتـاب
مــن البـدايـه للنهـايـه حزيـنـه
واقــول يالله لاتـبـارك بالاسـبـاب
اللـي رمتنـي بيـن حبـه .. وبيـنـه

الشاعر / لافي بن حمود الغيداني الحربي

انفقع راسي


الهواوي يعطيك الف عافيه

اشكر مرورك يامديرنا الفاضل
ويعطيك العافيه
ولك خااااااااااااالص تحياااااااااااااتي

صح لسان قايلها وتسلم يمين ناقلها

ودي